15
May

ပြည်ထောင်စုလွှတ်တော်သို့ တင်ပြသည့်အစီရင်ခံစာအားပြည်နယ်လွှတ်တော်သို့ ကောက်နုတ်တင်ပြခြင်း

ဒုတိယအကြိမ် ကယားပြည်နယ်လွှတ်တော် နဝမပုံမှန်အစည်းအဝေး(ဒုတိယနေ့) (၃၀-၃-၂၀၁၈) ရက်နေ့၌ ကယားပြည်နယ်လွှတ်တော်ဥက္ကဋ္ဌမှ (၁၃၇)ကြိမ်မြောက် နိုင်ငံတကာပါလီမန်များ ညီလာခံသို့ တက်ရောက်ခဲ့သည့် မြန်မာလွှတ်တော် ကိုယ်စားလှယ်အဖွဲ့၏ ပြည်ထောင်စုလွှတ်တော်သို့ တင်ပြသည့်အစီရင်ခံစာအားပြည်နယ်လွှတ်တော်သို့ ကောက်နုတ်တင်ပြခြင်း

ကိုယ်စားလှယ်အဖွဲ့ခေါင်းဆောင် ဦးတီခွန်မြတ်က Emergency Item နှင့် စပ်လျဉ်း၍ ညီလာခံသို့ ရှင်းလင်းတင်ပြသည့် မိန့်ခွန်းကိုပြောကြားခဲ့ရာ အောက်ပါအတိုင်း ကောက်နုတ်ဖော်ပြ အပ်ပါတယ် –

– “ရခိုင်ပြည်နယ်တွင် ဖြစ်ပွားနေသော လူသားချင်းစာနာထောက်ထားမှုအခြေအနေ” ဟူသော ခေါင်းစဉ်ဖြင့် အရေးပေါ်အကြောင်းအရာဆိုင်ရာ ဆုံးဖြတ်ချက်မူကြမ်းတစ်ခုကို တင်သွင်းလိုပါကြောင်း၊

– ရခိုင်ပြည်နယ်အခြေအနေသည် အလွန်ရှုပ်ထွေးပြီး စိန်ခေါ်မှုများရှိပါသဖြင့် အလျင်စလို ဖြေရှင်း၍ မရပါကြောင်း၊ ကာလရှည်ဖွံ့ဖြိုးတိုးတက်မှု နိမ့်ကျမှုများကြောင့် ရခိုင်နှင့် မွတ်စလင် အသိုင်းအဝိုင်းများအကြား ဆယ်စုနှစ်များစွာကတည်းက အမြစ်တွယ် လာခဲ့သည့် တစ်ဖက်နှင့်တစ်ဖက် အပြန်အလှန်မယုံကြည်မှု၊ စိုးရိမ်ကြောက်ရွံ့မှုတို့ကို ပိုမိုဆိုးရွားလာစေခဲ့ပါကြောင်း၊

– ရခိုင်ပြည်နယ်သည် မြန်မာနိုင်ငံ၏ အဆင်းရဲဆုံး ပြည်နယ်တစ်ခုဖြစ်ပါကြောင်း၊ ၂၀၁၇ ခုနှစ်၊ သြဂုတ်လ (၂၅)ရက်တွင် ရခိုင်ဒေသတွင်း စတင်ပေါ်ပေါက်ခဲ့သည့် ရဲတပ်ဖွဲ့များ၊ လုံခြုံရေးတပ်ဖွဲ့ဝင်များ၏ ကင်းစခန်း(၃၀)ကို အကြမ်းဖက်သမားများ၏ အင်အားသုံး တိုက်ခိုက်မှုများက အခြေအနေကို ပိုမိုဆိုးရွားစေခဲ့ပါကြောင်း၊

– ရခိုင်ပြည်နယ်အတွင်း ဆောင်ရွက်နေသော တိုးတက်မှုအခြေအနေများနှင့် ရင်ဆိုင်နေရ သော စိန်ခေါ်မှုများဆိုင်ရာ ရှင်းလင်းချက်ကို မိမိတို့ ကိုယ်စားလှယ်အဖွဲ့မှ ဖြန့်ဝေထားပြီး ဖြစ်ပါကြောင်း၊ မကြာသေးမီက အကြမ်းဖက် တိုက်ခိုက်မှုဒဏ်ကို ခံစားခဲ့ရသော  ယင်းဒေသတွင် နေထိုင်သူအားလုံးအတွက် လူသားချင်းစာနာထောက်ထားမှုဆိုင်ရာ အကူအညီ အထောက်အပံ့များကို မြန်မာအစိုးရက လျင်လျင်မြန်မြန် တုံ့ပြန်ဆောင်ရွက် ပေးခဲ့ပါကြောင်း၊

– မိမိတို့တင်သွင်းသော ဆုံးဖြတ်ချက်(မူကြမ်း)သည် မြေပြင်တွင်ဖြစ်ပေါ်နေသော ပကတိ အခြေအနေမှန်ကို တင်ပြသောအဆိုပြုချက်ဖြစ်ပြီး ဒုက္ခသည်ဟုဆိုရာတွင် မွတ်ဆလင် များသာမကပဲ ဗုဒ္ဓဘာသာဝင်များ၊ ဟိန္ဒူဘာသာဝင်များနှင့် အခြားသော ဘာသာ ကိုးကွယ်ယုံကြည်ကြသည့် တိုင်းရင်းသားလူမျိုးနွယ်စုများလည်း ပါဝင်ပါကြောင်း၊

– မိမိတို့အနေဖြင့် ၂၀၁၇ ခုနှစ်၊ စက်တင်ဘာလ(၁၉)ရက်နှင့် အောက်တိုဘာလ (၁၂)ရက်နေ့ တို့တွင် နိုင်ငံတော်၏ အတိုင်ပင်ခံပုဂ္ဂိုလ်ပြောကြားခဲ့သည့် နိုင်ငံတော်အခြေပြမိန့်ခွန်းကို

ကြိုဆိုပါကြောင်းနှင့် အဓိကကျပြီး အလျင်အမြန် ဆောင်ရွက်ရမည့်လုပ်ငန်းတာဝန် (၃)ရပ်ကို နိုင်ငံတော်၏ အတိုင်ပင်ခံပုဂ္ဂိုလ်က သတ်မှတ်ပေးခဲ့ပါကြောင်း၊

– ယင်းတို့မှာ –

(က) မိမိနေရပ်သို့ ပြန်လာသူများအား လူသားချင်းစာနာထောက်ထားမှုဆိုင်ရာ အကူအညီများ ထောက်ပံ့ပေးရန်နှင့် နေရပ်ပြန်ပို့ခြင်းများ ကို ဆောင်ရွက်ရန်၊

(ခ)   နေရပ်စွန့်ခွာတိမ်းရှောင်နေရသူများအားလုံးကို ပြန်လည်နေရာချထားရေးနှင့် ပြန်လည် ထူထောင်ရေးလုပ်ငန်းများ ဆောင်ရွက်ရန်၊

(ဂ)  ရခိုင်ပြည်နယ်တွင် စဉ်ဆက်မပြတ် ငြိမ်းချမ်းရေး၊ တည်ငြိမ်ရေးနှင့် ဖွံ့ဖြိုး တိုးတက်မှု တည်ဆောက်ရန် ဖြစ်ပါကြောင်း။

– လူသားချင်းစာနာမှု အကူအညီအထောက်အပံ့ပေးရေး၊ ပြန်လည်နေရာချထားရေး၊ ဖွံ့ဖြိုးရေးလုပ်ငန်းစဉ်များကို စီမံကိန်းချမှတ်ဆောင်ရွက်ပေးခြင်းသည် ရခိုင်ပြည်နယ် အတွင်း သို့မဟုတ် ရခိုင်ပြည်နယ်ပြင်ပသို့ နေရပ်စွန့်ခွာသွားသူများအားလုံးအပေါ် လူသားချင်းစာနာမှု အကူအညီများပေးအပ်နိုင်စေရန် လမ်းဖွင့်ပေးနိုင်မည်ဖြစ်ပါကြောင်း ပြောကြားခဲ့ပါတယ်။

အဆိုပါမူကြမ်း(၃)ခုအား မဲခွဲဆုံးဖြတ်ရာတွင် အဖွဲ့ဝင်သုံးပုံနှစ်ပုံ၏ ထောက်ခံမဲ အများဆုံး ရရှိခဲ့သဖြင့် Emergency item အဖြစ် ထည့်သွင်းဆွေးနွေးရန် ဆုံးဖြတ်ခဲ့ပါတယ်။

ယင်းအဆိုမူကြမ်းအား Consensus resolution တစ်ခုအဖြစ် ညီလာခံအစည်းအဝေးက အတည်ပြုဆုံးဖြတ်ခဲ့ကြပြီး မြန်မာကိုယ်စားလှယ်အဖွဲ့ခေါင်းဆောင်က အဆိုပါမူကြမ်းတစ်ခုလုံးကို လက်မခံဘဲပယ်ချခဲ့၍ Dissociate ပြုလုပ်ကြောင်း ပြန်လည်ပြောကြားခဲ့ပါတယ်။ မြန်မာကိုယ်စား လှယ်အဖွဲ့ခေါင်းဆောင်၏ တုံ့ပြန်ချေပချက်ကို အောက်ပါအတိုင်း ကောက်နုတ်ဖော်ပြအပ်ပါတယ် –

–         ဆုံးဖြတ်ချက်မူကြမ်း A/137/2-P.15 တွင် ဖော်ပြထားမှုအပေါ် မိမိတို့ ကိုယ်စားလှယ်အဖွဲ့ အနေဖြင့် ရှင်းလင်းချေပလိုပါကြောင်း၊

–         ဆုံးဖြတ်ချက်မူကြမ်း၏ စာပိုဒ်များတွင် ပြင်းထန်စွာဖော်ပြထားသော မျိုးနွယ်စုအလိုက် သုတ်သင်ရှင်းလင်းခြင်း၊ အချက်အလက်ရှာဖွေရေးအဖွဲ့နှင့် ဘေးကင်းဇုံဆိုသည့် ဖော်ပြချက်များသည် လက်တွေ့မြေပြင်အခြေအနေနှင့် ကွာခြားပါကြောင်း၊

–         လူသားချင်းစာနာထောက်ထားမှု အခြေအနေအပေါ် မီးလောင်ရာလေပင့်ပြုလုပ်ခြင်း သည် ကိုယ်ကျိုးအတွက် မျှော်ကိုးဆောင်ရွက်နေသည့် ပုံစံဖြစ်နေပြီး လက်တွေ့တွင် အင်တိုက် အားတိုက် ဖြေရှင်းဆောင်ရွက်နေမှုကို ကူညီရာမရောက်ပါကြောင်း၊

–         မိမိတို့အနေဖြင့် နိုင်ငံတကာအသိုက်အဝန်း၏ စာနာနားလည်မှု၊ အကူအညီပေးမှုများနှင့် အညီ ရခိုင်ပြည်နယ်မြောက်ပိုင်းတွင် ဖြစ်ပွားနေသော လူသားချင်းစာနာထောက်မှု အခြေအနေနှင့် စပ်လျဉ်း၍ ဖြေရှင်းရန် အချိန်ထပ်မံလိုအပ်မည်ဖြစ်ပါကြောင်း၊

–         ထို့ကြောင့် မိမိတို့ကိုယ်စားလှယ်အဖွဲ့အနေဖြင့် ဆုံးဖြတ်ချက်မူကြမ်းတွင် ပါဝင်သော အကြောင်းအရာများကို သဘောမတူပါကြောင်း ပြောကြားခဲ့ပါတယ်။

တရုတ်နိုင်ငံကိုယ်စားလှယ်အဖွဲ့မှ အဆိုမူကြမ်းနှင့် ပတ်သက်၍ ရခိုင်ပြည်နယ်၌ လက်ရှိ ဖြစ်ပွားလျှက်ရှိသော အခြေအနေများသည် ရှုပ်ထွေးမှုရှိပြီး တရုတ်နိုင်ငံအနေဖြင့် စိုးရိမ်မိပါကြောင်း၊ အဆိုပါ ပြဿနာဖြေရှင်းရာတွင် နိုင်ငံတကာအသိုင်းအဝိုင်း၏ အရေးပါမှုနှင့် စိုးရိမ်ပူပန်မှုများကို နားလည်ပါကြောင်း၊ ထို့ပြင် မြန်မာနိုင်ငံနှင့် ဘင်္ဂလားဒေ့ရှ်နိုင်ငံတို့အကြား နှစ်နိုင်ငံ လက်ရှိဆွေးနွေး ညှိနှိုင်းလျှက်ရှိသည့်အတိုင်း ဆက်လက်ညှိနှိုင်းပူးပေါင်း ဆောင်ရွက်ရန်အရေးကြီးပါကြောင်း၊ အဆိုပါ မူကြမ်းတွင် ပါဝင်သည့်အကြောင်းအရာများအပေါ် တရုတ်နိုင်ငံအနေဖြင့် သံသယဖြစ်ပါကြောင်း ပြန်လည် ဆွေးနွေးခဲ့ပါတယ်။

General Debate ၌ မူဝါဒမိန့်ခွန်းပြောကြားခြင်း

ထို့နောက် ညီလာခံအစည်းအဝေးကျင်းပရာ Dumsky Hall ၌ ပြုလုပ်သည့် General Debate ၌ ပြည်သူ့လွှတ်တော်ဒုတိယဥက္ကဋ္ဌ ဦးတီခွန်မြတ်သည် မူဝါဒမိန့်ခွန်းတစ်ရပ်အား ပြောကြားခဲ့ရာ အောက်ပါအတိုင်း ကောက်နုတ်ဖော်ပြအပ်ပါတယ် –

–         “ကိုးကွယ်ရာဘာသာပေါင်းစုံနှင့် လူမျိုးနွယ်စုပေါင်းစုံတို့အကြားတွင် ညှိနှိုင်း ဆွေးနွေးခြင်း ဖြင့် ယဉ်ကျေးမှုဓလေ့ဆိုင်ရာ အများယှဉ်တွဲနေထိုင်ရေးဝါဒနှင့် ငြိမ်းချမ်းမှုတို့ကို မြှင့်တင် တည်ဆောက်ရေး”ဟူသော theme (အဓိကခေါင်းစဉ်)ကို ကျွန်ုပ်တို့က ကြိုဆိုထောက်ခံပါ ကြောင်း၊ အကြောင်းမှာ အဆိုပါ သဘောတရားသည် ကျယ်ပြန့်စွာကွဲပြားနေသော လူမျိုးများ၊ နိုင်ငံများအကြားတွင် ငြိမ်းချမ်း၍ သဟဇာတဖြစ်စွာ အတူယှဉ်တွဲနေထိုင်မှုကို ကြိုပမ်းတည်ဆောက်နိုင်မည့် အခြေအနေပေးသော ပတ်ဝန်းကျင်တစ်ခု၏ အနှစ်သာရ ဖြစ်သော အခြင်းအရာတစ်ခုဖြစ်သည်ဟု ကျွန်ုပ်တို့က စဉ်းစားရှုမြင်သောကြောင့်  ဖြစ်ပါ ကြောင်း၊ မိမိတို့ ကိုယ်စားလှယ်အဖွဲ့အနေဖြင့် ကိုးကွယ်ရာဘာသာပေါင်းစုံနှင့် လူမျိုးနွယ်စုပေါင်းစုံ ညှိနှိုင်းဆွေးနွေးမှုများကို တိုးမြှင့်ပြုလုပ်နိုင်မှသာလျှင် လူမှုရေး ပေါင်းစည်းမှုနှင့် တည်ငြိမ်မှုတို့ကို ရရှိနိုင်မည်ဟု ရှုမြင်ပါကြောင်း၊

–         ဤနေရာ၌ အချက်တစ်ချက်ကိုဖော်ပြရန် သင့်တော်ပါကြောင်း၊ ထိုအချက်မှာ မြန်မာ နိုင်ငံရှိ နိုင်ငံလုံးဆိုင်ရာ ဘာသာပေါင်းစုံအဖွဲ့ဖြစ်သော “မြန်မာနိုင်ငံဘာသာပေါင်းစုံ ဆွေးနွေးမှုအဖွဲ့”နှင့် “မြန်မာနိုင်ငံလုံးဆိုင်ရာ အစ္စလာမ်မစ်ဘာသာရေးအဖွဲ့” တို့သည် ဘာသာပေါင်းစုံနှင့် လူမျိုးပေါင်းစုံ ဆွေးနွေးပွဲတွင် တက်ကြွစွာပါဝင်ခဲ့ကြပါကြောင်း၊ လူ့အသက်များ၊     ပစ္စည်းဥစ္စာများ ဆုံးရှုံးမှုကိုဖြစ်စေသည့် တိုက်ခိုက်သတ်ဖြတ်မှုနှင့် အကြမ်းဖက်ဝါဒတို့ကို မည်သည့်ဘာသာတရားကမျှ ခွင့်လွှတ်မည်မဟုတ်ကြောင်း ထိုအဖွဲ့အစည်း များက ထပ်မံကြေညာခဲ့ကြပါကြောင်း၊

–         ကမ္ဘာ့နိုင်ငံအားလုံးကို ကိုယ်စားပြုသည့် လွှတ်တော်ကိုယ်စားလှယ်များ အကြားတွင် ပွင့်လင်း၍ တန်းတူညီမျှဖြစ်သော  ဆွေးနွေးမှုများပြုလုပ် နိုင်သည့် နေရာတစ်ခုဖြစ်သည့် ဤညီလာခံသည် လက်ရှိကမ္ဘာက ရင်ဆိုင်နေရသော စိန်ခေါ်မှုများကို ဖြေရှင်းနိုင်သည့် အခွင့်အလမ်းကိုပေးလိမ့်မည်ဟု ကျွန်ုပ်တို့ နားလည်သဘောပေါက်ပါကြောင်း၊

–         မြန်မာနိုင်ငံ၏ ဒီမိုကရေစီရေးဆိုင်ရာ ပြုပြင်ပြောင်းလဲမှုများနှင့် စပ်လျဉ်း၍ ကျွန်ုပ်တို့၏ လွှတ်တော်၊ အစိုးရနှင့် အရပ်ဘက်လူ့အဖွဲ့အစည်းများ၏ အစိတ်အပိုင်းအားလုံးသည် အမျိုးသားပြန်လည်သင့်မြတ်ရေး၊ ငြိမ်းချမ်းရေး၊ တရားဥပဒေစိုးမိုးရေး၊ အစွန်းရောက် အကြမ်းဖက်ဝါဒ၏ ခြိမ်းခြောက်မှုများကို ကာကွယ်တုံ့ပြန်ရေး၊ စီးပွားရေးဖွံ့ဖြိုးတိုးတက် ရေး၊ လူ့စွမ်းအားအရင်းအမြစ် ဖွံ့ဖြိုးတိုးတက်ရေးကဲ့သို့သော စိန်ခေါ်မှုမျိုးစုံကို ရင်ဆိုင် ဖြေရှင်းရလျက်ရှိပြီး၊ မြန်မာနိုင်ငံအား စစ်မှန်သောဒီမိုကရေစီနိုင်ငံအဖြစ်သို့ ကူးပြောင်း နိုင်ရန်အတွက် စည်းလုံးညီညွတ်သော အားထုတ်မှုများဖြင့် အပြင်းအထန်ကြိုပမ်း ဆောင်ရွက်လျက်ရှိကြပါကြောင်း၊

–                                 မြန်မာနိုင်ငံသည် ကမ္ဘာပေါ်တွင် လူမျိုးနွယ်စု ကွဲပြားမှုအများဆုံးနိုင်ငံများ အနက်မှ တစ်ခုဖြစ်ပါကြောင်း၊ မြန်မာနိုင်ငံသည် ကိုယ်ပိုင်ထူးခြားသော ယဉ်ကျေးမှုနှင့် ဗုဒ္ဓဘာသာ၊ အစ္စလာမ်ဘာသာ၊ ခရစ်ယာန်ဘာသာ၊ ဟိန္ဒူဘာသာတို့အပါအဝင် ကိုးကွယ်ရာဘာသာ အမျိုးမျိုးရှိကြသော တရားဝင်အသိအမှတ်ပြုထားသည့် လူမျိုးနွယ်စု(၁၃၅)စုတို့၏ နေအိမ်ဖြစ်ပါကြောင်း၊ ထိုလူမျိုးနွယ်စုများသည် နိုင်ငံ၏ သမိုင်းတစ်လျှောက်တွင် အချင်းချင်းသဟဇာတဖြစ်စွာ နေထိုင်လာခဲ့ကြပါကြောင်း၊

–         ကျွန်ုပ်တို့၏ ဆန်းစစ်သုံးသပ်ချက်အရ ရခိုင်ပြည်နယ်၏ လက်ရှိအခြေအနေသည် အကြမ်းဖက်ဝါဒကြောင့် ဖြစ်ပွားရခြင်းဖြစ်ပြီး၊ ဘာသာရေး သို့မဟုတ် လူမျိုးရေးပဋိပက္ခ ကြောင့် ဖြစ်ပွားခဲ့ခြင်းမဟုတ်ပါကြောင်း၊ ဤအခြေအနေကို လူတစ်စုက “နယ်မြေ သိမ်းပိုက်ရေး” ဟူသော သိသာထင်ရှားသည့် နိုင်ငံရေးရည်မှန်းချက်ဖြင့် ဖန်တီးနေခြင်း သာ ဖြစ်ပါကြောင်း၊

–         ကျွန်ုပ်တို့သည် ရခိုင်ပြည်နယ်အပါအဝင် မြန်မာနိုင်ငံတစ်ဝန်းလုံး၌ ငြိမ်းချမ်းမှု၊ တည်ငြိမ်မှု၊ တရားဥပဒေစိုးမိုးမှုတို့ကို ပြန်လည်တည်ဆောက်နိုင်အောင် တသမတ်တည်း ခိုင်မြဲစွာ သန္နိဋ္ဌာန်ချမှတ်ထားကြပါကြောင်း၊ ကျွန်ုပ်တို့သည် လူ့အခွင့်အရေးချိုးဖောက်မှု တစ်စုံ တစ်ခုကိုဖြစ်စေ၊ အားလုံးကိုဖြစ်စေ၊ မည်သည့်အကြမ်းဖက်မှုပုံစံကိုဖြစ်စေ၊ မည်သည့် အကြောင်းပြချက်နှင့်မျှ လက်ခံခွင့်လွှတ်မည်မဟုတ်ပါကြောင်း၊

–         နိုင်ငံတော်အစိုးရနှင့် မြန်မာပြည်သူတို့အနေဖြင့် ရခိုင်၊ မွတ်ဆလင်၊ ဒိုင်းနက်၊ မြို၊ သက်၊ မရမာကြီး၊ ဟိန္ဒူတို့ အပါအဝင်ဖြစ်သည့် အလွန်ပြင်းထန်သော ဆင်းရဲဒုက္ခများကို   ကာလရှည်စွာ ခံစားခဲ့ကြရသည့် ထိခိုက်ခံရသော အသိုက်အဝန်းအားလုံး၏ ခံစားရမှု များ၊ ဒုက္ခများအတွက် အလွန်ပင်စိတ်မသက်မသာ ဖြစ်ရပါကြောင်း၊ ထိုသူတို့အားလုံးသည် တိုက်ခိုက်မှုများနှင့် အကြမ်းဖက်ဝါဒတို့၏ သားကောင်များဘဝ ကြုံတွေ့ရလျက်ရှိပါ ကြောင်း၊

–         ၂၀၁၇ ခုနှစ်၊ သြဂုတ်လ (၂၅)ရက်နေ့၏ အစောပိုင်းအချိန်များတွင် တရားဥပဒေစိုးမိုးရေးကို ကာကွယ်စောင့်ရှောက်နေကြပြီး ဒေသအတွင်း နေထိုင်သည့် လူနည်းစု၊ လူမျိုးနွယ်စု အသိုက်အဝန်းများအား အကာအကွယ်ပေးနေသည့် မြန်မာနိုင်ငံရဲကင်းစခန်း(၃၀)ကို စနစ်တကျ ကြိုတင်စီစဉ်ထားသည့်တစ်ပြိုင်နက် တိုက်ခိုက်မှုများ ပြုလုပ်ခဲ့ပါကြောင်း၊ ARSA အကြမ်းဖက်သမားများ၏ တိုက်ခိုက်မှုများသည် နက်နဲရှုပ်ထွေးသော အခြေအနေကို ပိုမိုဆိုးရွားစေပါကြောင်း၊

–   မူလကပင် ရှုပ်ထွေးသောအခြေအနေကို ဖြေရှင်းနိုင်မည့် အားလုံးသဘောတူညီ၍ ရေရှည် တည်တံ့ငြိမ်းချမ်းသော ဖြေရှင်းချက်တစ်ခုကိုရှာဖွေရန် ကြိုးပမ်းချက်များ၏  အစိတ် အပိုင်းအဖြစ် မြန်မာအစိုးရက တည်ဆောက်နေသော အလွန်အားနည်းနေသေးသည့် တရားဥပဒေစိုးမိုးမှုအခြေအနေကို ထိခိုက်ပျက်ပြားစေခဲ့ပြီး ပိုမို၍မတည်မငြိမ် ဖြစ်စေခဲ့ ပါကြောင်း၊ ဤအခြေအနေသည် ARSA အဖွဲ့က အသုံးချနေသည့် အကြမ်းဘက် နည်းဗျူဟာများမှ လွတ်မြောက်ရန်အတွက် အေးချမ်းစွာနေထိုင်သူအားလုံး အစုအပြုံ လိုက် နေရပ်စွန့်ခွာရွှေ့ပြောင်းမှုကို ဖြစ်ပေါ်စေခဲ့ပါကြောင်း လူအချို့သည် အိမ်နီးချင်းနိုင်ငံ သို့ ထွက်ပြေးခဲ့ကြပြီး အခြားသူများသည် ရခိုင်ပြည်နယ်၏ မြို့တော်သို့ ထွက်ပြေးခဲ့ကြ ပါကြောင်း၊ ရခိုင်ပြည်နယ်ရှိ ပိုမိုငြိမ်းချမ်းသော ဒေသများသို့ ထွက်ပြေးခဲ့ကြသူများအတွက် နိုင်ငံတော်အစိုးရက လူသားချင်းစာနာမှု အကူအညီများကို ခွဲခြားမှုမရှိဘဲ အခြေခံ စည်းမျဉ်းများနှင့်အညီ ထောက်ပံ့ပေးလျက်ရှိပါကြောင်း၊

–     နိုင်ငံတော်အစိုးရသည် ကမ္ဘာ့ကုလသမဂ္ဂအဖွဲ့ အထွေထွေအတွင်းရေးမှူးချုပ် ဟောင်း မစ္စတာကိုဖီအာနန် ခေါင်းဆောင်သည့် ရခိုင်ပြည်နယ်ဆိုင်ရာ အကြံပေးကော်မရှင်၏ အကြံပြုချက်များကိုလက်ခံခဲ့ပြီး ယင်းတို့ကို လက်တွေ့အခြေအနေများနှင့်အညီ အကောင်အထည်ဖော်ရန် ကတိပြုထားပါကြောင်း၊ အရေးပေါ်အဆိုတွင်  ဖော်ပြထားသည့် အကြောင်းကိစ္စများစွာသည် အကြံပေးကော်မရှင်၏ အစီရင်ခံစာတွင် ဖော်ပြပါရှိပြီး ဖြစ်သည်ဟူသောအချက်ကို သတိပြုသင့်ပါကြောင်း၊

–         မြန်မာနိုင်ငံ၏ ရှည်လျားသော သမိုင်းစဉ်တစ်လျောက်တွင် မြန်မာနိုင်ငံသည် အိမ်နီးချင်း  နိုင်ငံ (၅)ခုနှင့် နယ်နိမိတ်ချင်းထိစပ်တည်ရှိခဲ့ပြီး   နိုင်ငံ (၂)ခုမှာ အလွန်များပြားသော

လူဦးရေရှိကြပါကြောင်း၊ ကျွန်ုပ်တို့သည် သာမန် နယ်စပ်ရေးရာကိစ္စများကို ရင်းနှီးစွာ ဆွေးနွေးအဖြေရှာခြင်းဖြင့် အိမ်နီးချင်း (၅)နိုင်ငံအနက်မှ (၄)နိုင်ငံနှင့် ငြိမ်းချမ်းသော ဆက်ဆံရေးများကို ထိန်းသိမ်း ထားနိုင်ခဲ့သည် ဟူသောအချက်မှာ သမိုင်းမှတ်တမ်းတင် လောက်သည့် အချက် ဖြစ်ပါကြောင်း၊

–     မြန်မာလွှတ်တော်များသည် အလွန်သက်တမ်းနုနယ်သော အဖွဲ့အစည်း ဖြစ်သော်လည်း ရခိုင်ပြည်နယ်အခြေအနေကို အေးချမ်းခင်မင်စွာ ဖြေရှင်းနိုင်သည့် ဆုံးဖြတ်ချက်တစ်ရပ် ကို တွေ့ရှိချမှတ်နိုင်ရေး ကြိုးပမ်းချက်များတွင် နက်ရှိုင်းစွာ ဆက်စပ်ပါဝင်လျက်ရှိပါ ကြောင်း၊ ပြီးခဲ့သည့်နှစ်လအတွင်းတွင် မြန်မာလွှတ်တော်နှစ်ရပ်၌ အဆိုတစ်ခုကို ပြည်သူ့လွှတ်တော်ကိုယ်စားလှယ်များက(၂)ရက်ကြာ၊ အမျိုးသားလွှတ်တော်ကိုယ်စားလှယ် များက (၅)ရက်ကြာ ဆွေးနွေးခဲ့ကြပါကြောင်း၊  ထိုအဆိုမှာ ပြဿာနာဖြစ်ပွားခဲ့သည့် ဒေသကို စွန့်ခွာသွားသူများ ပြန်လည်နေထိုင်နိုင်သည့် ပုံမှန်အခြေအနေသို့ အတိုင်းအတာ တစ်ခုထိ ပြန်လည်ရောက်ရှိအောင် အကြမ်းဖက်မှုတိုက်ဖျက်ရေးဥပဒေနှင့်အညီ အရှိန်အဟုန်ဖြင့် ဆောင်ရွက်ရန် အစိုးရအား တိုက်တွန်းရေးအဆို ဖြစ်ပါကြောင်း၊ မြန်မာနိုင်ငံ၏ ပြည်သူအားလုံးကို ကိုယ်စားပြုခြင်း၊ မူဝါဒများကို စေ့စပ်သေချာစွာ စိစစ်ဆွေးနွေးခြင်းနှင့် သက်ဆိုင်ရာ ဥပဒေများကို အတည်ပြုခြင်း၊ အစိုးရအနေဖြင့် တာဝန်ခံမှုရှိစေရန် ကြီးကြပ်ခြင်းတို့ပါဝင်သည့် ဥပဒေပြုသူများ၏ ထိရောက်သော လုပ်ငန်းတာဝန်ကို ဆောင်ရွက်ရန် အစွမ်းကုန်အားထုတ်မည်ဖြစ်ကြောင်း ပြောကြားခဲ့မှု အပေါ် ကောက်နုတ်တင်ပြခြင်း ဖြစ်ပါတယ်။